Við mælum líka með viðtölum við Berkoff og hugleiðingum en það efni má finna á tenglasíðunni okkar.

Steven Berkoff

Höfundurinn Steven Berkoff er feikilega vel kynntur í leikhúsheiminum, jafnt sem leikari, leikstjóri, leikritaskáld og rithöfundur.Hér á landi þekkjum við hann helst sem vonda kallinn úr kvikmyndum eins og Rambo, Beverly Hills Cop, Octopussy og War and Remembrance.  Í leikhúsinu er hann líka uppreisnarseggur og hefur vakið athygli fyrir að fara algjörlega eigin leiðir.  Berkoff er af mörgum talinn einn besti og frumlegasti leikhúslistamaðurinn í heiminum. 

Steven Berkoff hlaut sína leikhúsmenntun í London og París, en þar nam hann hjá Jaques Le Coq.  Hann stofnaði sinn eigin leikhóp, the London Theatre Group árið 1968 og fór strax að vekja verulega athygli.  Fyrsta sýning þess hóps var   In the Penal Colony en það var útfærsla Berkoff á smásögu eftir Kafka.  Berkoff hefur einmitt öðlast frægð fyrir sínar “útgáfur” á klassískum verkum eins og Réttarhöldunum og Metamorphosis eftir Kafka, gríska harmleiknum Agamemnon og The Fall of the House of Usher eftir Edgar Allen Poe.  Þá hefur hann náð stórkostlegum árangri í nýstárlegum uppfærslum á verkum Shakespeares.

Meðal leikverka Steven Berkoff eru West, Decadence (síðar kvikmynd með Joan Collins), Greek, Kvetch, Acapulco, Harry´s Christmas, Lunch, Sink the Belgrano, Massage, Sturm und Drang, Brigton Beach Scumbags, Messiah og svo hans þekktasta verk, East. Berkoff hefur ferðast um heiminn með leikverk sín og er fastagestur á leiklistarhátíðum, sérstaklega í Edinborg þar sem hann er orðinn eins og stofnun.  Vert er að benda á grein Bergljótar Arnalds, en hún var aðstoðarmaður Berkoff í Edinborg árið 1994.    Hann er “enfant terrible” í leikhúsheiminum og hikar ekkert við að segja skoðanir sínar á mönnum og málefnum. Þannig hatast hann við allt West End og Broadway leikhús, sem hann telur andvana fætt og hann lætur ótrúlega hluti út úr sér um leikhúsmenn eins og Peter Hall.  Frægt var svo þegar hann gekk einn á móti verkfalli leikara í Bandaríkjunum og lék í MacDonald´s auglýsingu.  Það þótti ekki sæma baráttumanninum og anti-kapitalistanum Berkoff.   En svona er hann, kemur sífellt á óvart og fer algjörlega sínar eigin leiðir. 

Berkoff hefur leikið í fjölmörgum kvikmyndum eins og áður sagði og eru þær jafn misjafnar að gæðum og þær eru margar.  Meðal þeirra mynda sem ekki höfðu verið nefndar eru A Clockwork Orange, Barry Lyndon, Under the Cherry Moon, Absolute Beginners, Prisoner of Rio, The Krays og svo auðvitað stórmyndin Another 9½ Weeks!

Berkoff hefur líka verið feikilega afkastamikill rithöfundur og gefið út bækur um leiklist, dagbækur einstakra verkefna, smásagnasöfn, leikrit, ferðabækur og ljóð.  Ævisaga hans heitir Free Association og var gefin út af Faber & Faber árið 1996.  Við mælum með smásagnasafninu Graft: Tales of An Actor sem kom út árið 1998. Frábærlega vel skrifuð innsýn í líf leikarans.   Í heildina má segja að lífsstarf þessa mikla listamanns sé með ólíkindum og í raun ótrúlegt að verk hans skuli ekki hafa ratað inn á íslenskt leiksvið fyrr en nú.