Leikhópurinn Á senunni, Tjarnarbíó og Drill Hall í London kynna:

Ævintýrið um Augastein
Frábær jólasýning fyrir alla fjölskylduna!

Snýr aftur heim í Tjarnarbíó og leikferð til London!

Leikhópurinn Á senunni kynnir enn á ný hina margrómuðu og yndislega fallegu jólaleiksýningu Ævintýrið um Augastein eftir Felix Bergsson, í samstarfi við Kolbrúnu Halldórsdóttur og Helgu Arnalds, sem verður að nýju sýnd í nóvember og desember 2010 í hinu nýuppgerða og glæsilega Tjarnarbíói við Tjarnargötu (www.tjarnarbio.is) Íslensk útgáfa verksins var einmitt frumsýnd í Tjarnarbíói árið 2003. Það má því segja að Augasteinn sé kominn aftur heim!

Sýningin var upprunalega hönnuð sem farandsýning og þetta árið fer hún enn á flakk. Á síðasta ári var hún sýnd á NICE listahátíðinni í Liverpool og sló í gegn í Unity leikhúsinu. Áhorfendur fylltu tvær sýningar og skemmtu sér hið besta (sjá dóm: http:// hopestreet.co.uk/2009/11/icelandic-puppets-at-unity-theatre/) Einnig var haldið með sýninguna til London á vegum Drill Hall leikhússins (www.drillhall.co.uk). Það verður endurtekið í ár og farin leikferð í skóla í nágrenni London áður en haldið verður aftur heim í Tjarnarbíó. Þess má geta að barnabókin Ævintýrið um Augstein fékk glimrandi viðtökur fyrir jólin 2003 og seldist í þúsundum eintaka.

Ævintýrið um Augastein var frumsýnt í London árið 2002 og á Íslandi árið 2003. Verkið byggir á hinni sígildu sögu um Grýlu og jólasveinana en ævintýrið er tekið lengra og sagan um litla drenginn, sem nefndur er Augasteinn, verður miðpunktur leikritsins. Augasteinn lendir fyrir tilviljun í höndum hinna hrekkjóttu jólasveina sem læra smám saman að elska litla drenginn og annast hann. Skyndilega kemst Grýla á snoðir um tilveru barnsins og við tekur æsispennandi flétta. Ná jólasveinarnir að bjarga Augasteini úr klóm Grýlu og Jólakattarins áður en jólin ganga í garð?

Það er Felix Bergsson sem leikur öll hlutverkin í Ævintýrinu um Augastein. Brúður og leikmynd eru eftir Helgu Arnalds, lýsingu hannaði Jóhann Bjarni Pálmason og tónlistin var útsett af Hróðmari Inga Sigurbjörnssyni fyrir Háskólakórinn undir stjórn Hákons Leifssonar. Hljóðmynd er verk Sveins Kjartanssonar. Leikstjóri er Kolbrún Halldórsdóttir.

Nánari upplýsingar, myndir og annan fróðleik má finna á www.senan.is og miðasala er á www.midi.is

Sýningar sem í boði eru verða sunnudagana 28. nóvember og 12. desember kl. 14.00 og 16.00 og 19. desember kl. 13.00

Athugið – aðeins þessar 5 sýningar á Íslandi!!

Leikhópurinn Á senunni sem hélt upp á 10 ára afmæli á síðasta ári fékk Grímuna fyrir leiksýningu ársins árið 2003, Kvetch og aftur árið 2007 fyrir barnasýningu ársins, Abbababb!

„Þetta leikrit Felix Bergssonar er þeim kostum búið að hér er fullt af dramantískri spennu..“ „Hér er margt sem gleður augu og eyru, ekki síður fullorðinna en barna... ef einhver hefur einhvern tímann átt erfitt með að komast til botns í gátunni um hvernig gömlu, hrekkjóttu sauðalitajólasveinarnir urðu að hinum gjafmildu öðlingum sem þeir eru í dag, þarf sá hinn sami að drífa sig í leikhús í fylgd nokkurra ungra leikhúsáhugamanna og finna svarið. Felix er nefnilega búinn að komast að þessu og miðlar því á dæmalaust einstakan máta ... nú fyrir jólin.“ (SH, Mbl.)

„Yndisleg sýning þar sem hæfileikar Felixar til að ná til barna nýtast að fullu! ... Perla!“ (SS, Rás 2)

„Sagan af Augasteini litla stendur fyllilega fyrir sínu því þetta er yndisleg saga..“ „Allt um vefjandi einlægni og kærleikur gefa bókinni mikið gildi. Felix hefur sprelllifandi frásagnargáfu..“ (dómur um bókina, KHK, Mbl.)

„This was a very entertaining show for all ages t... With humour, song and expert story-telling skills from Felix we were all engrossed from begining to end.“ (dómur www.hopestreet.co.uk)

„Við fórum í gær með rútu og vorum 15 mínútur á leiðinni og þetta fjallaði um 13 jólasveina og eitt lítið barn og grílu og jólaköttinn og þetta ver mjög skemmtilegt leikrit og findið og það var hangikjöt.
Og í leikritinu voru Stekkjarstaur, Giljagaur, Stúfur, Hurðarskellir, Gáttaþefur, Kertasníkir og allir hinir jólasveinarnir.
Og það var kertaljós, kústur og gærur og allir eða ég veit það ekki. En allavega ´ég skemmti mér vel og leikarinn var í gömlum fötum.“
(Konni í Ólafsvík, af heimasíðunni http://netheimar.net/ aefintyrid_um_augastein.htm)